Starfshópur um endurskoðun húsnæðisstuðnings við leigjendur
Innviðaráðherra hefur ákveðið að skipa starfshóp um endurskoðun húsnæðisstuðnings við leigjendur.
Hlutverk starfshópsins er að móta tillögur um hvernig sameina megi húsnæðisstuðning við leigjendur í formi húsnæðisbóta og sérstaks húsnæðisstuðnings í eitt stuðningskerfi á vegum ríkisins með það að markmiði að tryggja jafnræði og einfalda stuðningskerfið fyrir leigjendur. Vinna starfshópsins er liður í stuðningi stjórnvalda vegna kjarasamninga á almennum vinnumarkaði samkvæmt yfirlýsingu ríkisstjórnarinnar, dags. 12. desember 2022, til að styðja við markmið samninganna um að verja kaupmátt og lífskjör launafólks með áherslu á húsnæðismál.
Við útfærslu tillagna starfshópsins er lagt til grundvallar að byggt verði á niðurstöðu starfshóps um húsnæðisstuðning, í desember 2022, þar sem horft er til þess að við sameiningu kerfanna verði markmiðið að húsnæðiskostnaður tekjulægri heimila á leigumarkaði sé ekki íþyngjandi. Enn fremur verði sérstaklega litið til áhrifa á félagslega viðkvæma hópa, barnafjölskyldur og heimili með þunga framfærslubyrði.
Þá er starfshópnum falið að leggja heildrænt mat á áhrif sameiningarinnar á einstaka félagshópa og samspil við annan húsnæðisstuðning við leigjendur eftir því sem unnt er.
Starfshópurinn skal skila ráðherra skýrslu með tillögum sínum fyrir 1. október 2023.
Starfshópurinn er þannig skipaður:
Lísa Margrét Sigurðardóttir, án tilnefningar, formaður,
Róbert Farestveit, tiln. af Alþýðusambandi Íslands,
Sigríður Ingibjörg Ingadóttir, tiln. af BSRB, Bandalagi háskólamanna og Kennarasambandi Íslands,
Guðrún Ágústa Guðmundsdóttir, tiln. af félags- og vinnumarkaðsráðuneytinu,
Anna Borgþórsdóttir Olsen, tiln. af fjármála- og efnahagsráðuneytinu,
Henný Hinz, tiln. af forsætisráðuneytinu,
Drengur Óla Þorsteinsson, tiln. af Húsnæðis- og mannvirkjastofnun,
Rebekka Valsdóttir, tiln. af innviðaráðuneytinu,
Ása A. Kristjánsdóttir, tiln. af Sambandi íslenskra sveitarfélaga,
Páll Ásgeir Guðmundsson, tiln. af Samtökum atvinnulífsins.